„Ólaf­ur missti vinn­una í kjöl­far dóms er hann hlaut eft­ir að ráðist var inn á heim­ili okk­ar,“ segir Kolbrún Anna Jónsdóttir, eiginkona Ólafs William Hand í samtali við mbl.is. Ólafur var í desember sakfelldur fyrir alvarlegt ofbeldi gegn barnsmóður sinni og brot gegn barnaverndarlögum. Nú ætlar hann ásamt eiginkonu sinni að ganga Jakobsveginn, eða Vegur hins heilaga Jakobs, sem er ein þekkasta pílagrímaleið í Evrópu, en þau munu ganga frönsku leiðina sem telur  um 900 kílómetra.

Pílagrímsferðin mun taka að lágmarki mánuð, samkvæmt heimasíðu gönguleiðarinnar tekur hún um 35 daga ef gengnir eru 25 km á hverjum degi. Algengt mun þó vera að fólk taki sér einhverja daga inn á milli til að hvílast eða fyrir skoðunarferðir.

Kolbrún Anna segir að þau hjónin hafi búið í Rottedam í rúmt ár þegar líf þeirra breyttist algjörlega eftir að Ólafur var sakfelldur fyrir brot gegn barnsmóður sinni í desember.

Við ákváðum að við þurft­um að gera eitt­hvað upp­byggj­andi sam­an til að átta okk­ur á stöðunni fram að því að málið verður tekið fyr­ir í Lands­rétti,“ sagði Kolbrún.

Ólafur hefur áður gengið frönsku leiðina og segir þetta mikla upplifun. „Ég fór í júlí og gekk fram í miðjan ág­úst. Það var rosa­lega heitt en mik­il upp­lif­un. Þessi ferð verður alltaf eft­ir­minni­leg fyr­ir þær sak­ir að í henni tók ég þá ákvörðun um að biðja Kol­brún­ar og hérna erum við sam­an kom­in fimm árum síðar.“

Fyrsta kafla ferðarinnar ætla hjónin að tileinka Kraft, stuðningsfélagi fyrir ungt fólk með krabbamein. Hjónin ætla að að gefa félaginu 100 krónur fyrir hvern genginn kílómetra og hvetja aðra til að styrkja félagið um leið.

Annar kafli ferðarinnar verður tileinkaður huganum og síðan sá þriðji sálinni. „Maður kem­ur von­andi á leiðar­enda sem betri mann­eskja og í lík­am­lega góðu formi.“

Ólafur og Kolbrún hafa stofnað hóp á Facebook þar sem hægt verður að fylgjast með ævintýrum þeirra.

DV hefur fjallað töluvert um sakfellingu Ólafs. Hann var ákærður fyrir að hafa tekið barnsmóðurina hálstaki og þrengt ítrekað að hálsi hennar, hrint henni þannig að hún féll í gólfið, rifið í hár hennar og ýtt henni utan í vegg. Kolbrún var sömuleiðis ákærð fyrir að hafa hlaupið ítrekað á barnsmóðurina og klórað hana, en hún var sýknuð af þeim sökum.

Ólafur hefur áfrýjað málinu og kveðst hafa verið dæmdur fyrir að verja sitt eigið heimili.

Sjá einnig:

Ólafur Hand sakfelldur fyrir ofbeldi gegn barnsmóður sinni

Ólafur ætlar að áfrýja – Þetta mál hefur tekið mikið á mig og mína fjölskyldu

Elísabet um mál Ólafs – Aumingjaskapur hinna meðvirku

Ólafur Hand rekinn frá Eimskip – Tók barnsmóður hálstaki og þrengdi að 

Ólafur Hand áfram í stjórn GR – Dómurinn hefur ekki áhrif  á stjórnarsetuna