Stefán Einar Stefánsson segist ekki geta lagt mat á hvort eitthvað ólöglegt eða óeðlilegt hafi verið í gangi í skuldabréfaútboði WOW í nóvember 2018. DV ræddi við hann í aðdraganda fundar og útgáfuhófs vegna útkomu bóka hans. WOW – Ris og fall flugfélags. Myndbandsviðtal má horfa á í spilaranum neðst í fréttinni.

Stefán Einar var spurður hvort hann telji að eitthvað ólöglegt eða óeðlilegt hafi átt sér stað í skuldabréfaútboði WOW air í nóvember 2018. Í bókinni eru gögn sögð benda til þess að helmingur þess sem safnaðist í útboðinu hafi farið í skuldir:

„Ég get ekki lagt mat á það sem slíkt. Ég get bara lýst þeirri atburðarás og þeim gögnum sem liggja fyrir úr útboðinu. Hins vegar er ljóst að þeir sem tóku þátt í útboðinu hafa verið að skoða þetta ferli gaumgæfilega og þetta varpar nýju ljósi á hvernig það gekk fyrir sig. Það er svo þeirra – eins og raunar aðstandenda útboðsins – að skýra þetta mál frekar.“

Telja menn sig hafa verið svikna?

„Já, hluti hópsins hefur tjáð sig með þeim hætti í mín eyru, án þess ég greini frá því hvaða aðilar það eru, að þeir telji að þeir hafi í raun og veru verið beittir blekkingum. Þeir þurfi síðan að kanna hvort útboðið standist skoðun eða ekki. Það verður að taka tillit til þess í tenglum við þessa sögu alla að hlutirnir gerast mjög hratt á þessu mánuðum og það fjarar mjög hratt undan félaginu.“

Aðstæður geti hafa breyst mjög hratt frá þeim tíma þegar ákveðið var að efna til útboðsins og þegar það fór fram.

Hefði verið hægt að bjarga WOW án aðkomu ríkisins?

„Þegar upp var staðið reyndist ekki vilji hjá einkafjárfestum að koma inn í félagið og ég legg út með það í niðurstöðum bókarinnar að það hefði verið feigðarflagn af hálfu ríkisins að leggja fé í fyrirtækið eins og því var fyrir komið.“

Í myndskeiðinu segir Stefán Einar einnig frá ógnarstuttum ritunartíma bókarinnar og svarar spurningunni hvort hann hafi séð fall WOW air fyrir og verið klár með megnið af verkinu áður en örlagadagurinn 28. mars rann upp: