Stúlka hlaut alvarlega áverka í andliti eftir slys við dimmiteringu hjá Menntaskólanum á Akureyri í gær. Stúlkan mun hafa klemmst þegar vökvaknúinni loku á malarflutningavagni var lokað.
Frá þessu er greint í frétt á vef RÚV.
Þar segir að stúlkan hafi ekki hlotið lífshættulega áverka en þó hlotið alvarlega andlitsáverka. Var hún flutt með sjúkraflugi til Reykjavíkur.
Í fréttinni kemur fram að áfallateymi Rauða krossins hafi verið virkjað og rætt við skólafélaga stúlkunnar.
Þá segir að hefð sé fyrir því að nemendum sé ekið um í vögnum sem dregnir eru af traktorum. Haft er eftir lögreglu að ekki hafi verið veitt sérstakt leyfi fyrir þessum flutningum. Af því tilefni muni lögregla senda bréf til skóla í umdæminu þess efnis að hér eftir verði slíkir vagnar ekki notaðir í þessum tilgangi.
