Maður sætir nú gæsluvarðhaldi eftir að vera gripinn við að framvísa vegabréfi annars manns. Maðurinn er einn af þremur aðilum sem hafa verið teknir með fíkniefni innvortis undanfarið.

Samkvæmt tilkynningu frá Lögreglustjóranum á Suðunesjum er um að ræða erlendan mann sem kom til landsins frá Hamborg 14. mars síðastliðinn. Hann var stöðvaður af tollgæslu og í kjölfarið handtekinn af lögreglu. Reyndist hann vera með 100 grömm af kókaíni innvortis. Sami maður hafði komið til Íslands árið 2017 og handtekinn grunaður um tilraun til fíkniefnasmygls. Í kjölfarið var hann dæmdur í átta mánaða fangelsi.

„Nú reyndi hann að ferðast undir fölsku flaggi og framvísaði vegabréfi annars manns en varð ekki kápan úr því klæðinu. Hann sætir gæsluvarðhaldi til 17. þessa mánaðar.“

Lögreglan á Suðurnesjum hefur undanfarið haft þrjú mál til rannsóknar vegna tilrauna til fíkniefnasmygls. Í öllum tilvikum var um að ræða smygl  á fíkniefnum innvortis. Í hinum tveimur tilvikunum var um að ræða konur, önnur á leið frá London og hin frá Brussel. Var önnur þeirra með tæplega hálft kíló af kókaíni og hin með tæplega tvö hundruð grömm af sama efni.