Vegagerðin neitar að samningum um nýjan Herjólf hafi verið rift, líkt og greint var frá fyrr í dag. Rétt sé að Vegagerðin hafi innkallað bankaábyrgðir sem annars hefðu runnið út í dag.

Viðræður við Crist S.A skipasmíðastöðina eru enn í gangi og vill Vegagerðin ekki tjá sig um gang mála að svo búnu. Innköllun ábyrgðar hafi verið nauðsynleg til að Vegagerðin gæti tryggt stöðu sína í samningunum. Þetta kemur fram á Eyjafréttum.

„Vegagerðin hefur hins vegar innkallað bankaábyrgðir sem annars myndu renna út í dag og höfðu ekki verið framlengdar. Í dag kemur í ljós hvort skipasmíðastöðin framlengir ábyrgðirnar en viðræður við þá eru í gangi og ekki hægt að tjá sig um gang mála í þeim. Vegagerðin átti engan annan kost en innköllun ábyrgða til að tryggja stöðu sína“, sagði G. Pétur í samtali við Eyjafréttir.