Starfsfólk WOW air hélt markað með fatnað og heimilisvörur í Holtagörðum í dag en markaðurinn er opinn til kl. 18. Honum verður síðan fram haldið á morgun.
Margir starfsmenn WOW air eiga um sárt að binda eftir hið skyndilega gjaldþrot félagsins. Fyrirtækið varð gjaldþrota ekki löngu fyrir mánaðamót og þeir fengu engin laun um síðustu mánaðamót. Um tíma leit út fyrir að flugfreyjur WOW air yrðu margar hverjar að leita til Mæðrastyrksnefndar og Hjálparstofnunar kirkjunnar en ASÍ hljóp undir bagga og lánaði Flugfreyjufélagi Íslands 100 milljónir.
Ljósmyndari DV var á svæðinu og tók meðfylgjandi myndir. Sagði hún að markaðurinn hefði gengið vonum framar í dag: „Búið að vera stappað af fólki frá hádegi. Margir voru meira að segja mættir um 10 leytið í morgun til að freista þess að gera bestu kaupin. Fatamarkaðurinn verður aftur opinn á morgun milli 12 og 16. Flestir sem ég talaði við ætluðu líka að standa vaktina á sunnudaginn.“
