Baldvin Þorsteinsson, stjórnarformaður Eimskips og sonur Þorsteins Baldvinssonar forstjóra Samherja, veittist í morgun að Má Guðmundssyni seðlabankastjóra og sagði orðrétt við hann: „Sýndu smá sómakennd og drullaðu þér burtu.“ Þetta kemur fram í frétt á vef Fréttablaðsins. Atvikið átti sér stað eftir fund stjórnskipunar- og eftirlitsnefndar í morgun en þar var farið yfir framgöngu Seðlabankans gagnvart Samherja. Gjaldeyriseftirlit Seðlabankans framkvæmdi húsleitir í húsnæði Samherja vegna gruns um brot á gjaldeyrislögum en fyrirtækið var aldrei ákært og Seðlabankinn hefur verið ásakaður um að hafa farið offari í málinu.

Baldvin veittist að Má er seðlabankastjórinn hugðist heilsa Þorsteini, föður Baldvins, eftir fundinn. Samkvæmt frásögn Fréttablaðsins gekk Kolbeinn Óttarsson Proppé, þingmaður VG, á milli manna og stillti til friðar.