Erfiðleikar WOW air hafa ekki farið framhjá neinum sem fylgjast með fréttum og rær Skúli Mogensen nú lífróður til að bjarga félaginu.

Nýjustu fréttir eru þær að félagið þurfi 5 milljarða til að bjarga félaginu frá gjaldþroti. Hugmyndir Skúla Mogensen um útboð á nýju hlutafé og skuldbreytingu hjá skuldabréfaeigendum eru einnig möguleg leið út úr stöðunni.

Sjá einnig: Segja að WOW air þurfi 5 milljarða til að halda flugi

Í Facebook-færslu sinni stingur Pétur H. Hansen eigandi Marko merkja upp á leið til að bjarga WOW air, að bjóða einstaklingum að kaupa hlut í félaginu og fá í staðinn ákveðið margar flugferðir með félaginu. Nefnir Pétur að sú leið hafi verið farin til að bjarga Arnarflugi á sínum tíma.

Stingur Pétur upp á 300.000 kr. sem upphæð og telur upp nokkur dæmi um hvað hægt er að fá fyrir þann pening, þar á með pizzu fyrir fjögurra manna fjölskyldu alla föstudag í eitt ár og vikuleigu á sumarbústað í júlí.

Stingur Pétur að lokum upp á að Facebookvinir Skúla sendi honum þessa hugmynd.

Þankagangur minn í ljósi slæmra frétta áðan.

Icelandair slítur viðræðum við WOWair

Þetta eru ekki góðar fréttir. En hvað ef það yrði gert eins og Arnarflug gerði á sínum tíma.
Bjóða fólki að kaupa smáhlut í félaginu og fá í staðinn x margar flugferðir til Evrópu.
Ég man að ég gerði þetta fyrir 30 árum eða svo og þá voru það 100,000 krónur.
Mig minnir að ég hafi fengið 5 flugferðir til Evrópu. Það var fínn díll.

Ef 10% þjóðarinnar legði til 300,000 krónur hver þá myndi safnast 10,800,000,000 krónur.
Tíu milljarðar og átta hundruð milljónir. Skúli héldi sínum peningum áfram inni í félaginu sem hann hefur lagt í það. Hann fengi ekki að taka neitt út af því sem hann hefur lagt inn í það.
Allavegana ekki strax.
Við yrðum öll hluthafar í félaginu og fengjum að auki einhverja gulrót fyrir viðvikið í formi flugferða.
Síðan ef að úr rætist þá þá getur Skúli Mogensen vonandi rétt úr kútnum. 4000 störf glatast ekki og ekki verður af niðursveiflunni í hagkerfinu.

Hugsið ykkur: 300,000 krónur. Greiða það á 12 mánuðum.
(25,000 kr. á mánuði)

Hvað fáið þið fyrir 300,000 krónur?

1. 2 kassa af bjór og 2 rauðvín í mánuði eða
   2. KFC fjölskyldupakki f. 4 á föstudögum í eitt ár eða
   3. Pizza f. 4 manna fjölskyldu á föstudögum í eitt ár eða,
   4. Ef þú reykir 1 pakka á dag þá er upphæðin kominn á 8 mánuðum.
   5. 10 sinnum á ári út að borða á miðlungsveitingastað og síðan á barinn eða
   6. 3 helgarferðir á hótel úti á landi með laugardagskvöldverði og öðrum mat og drykk ásamt bensínkostnaði eða
   7. 1/2 laxveiðitúr með mat á ári eða
   8. Vikuleiga á sumarbústað í júlímánuði eða
   9. 40 golfhringir á golfvelli á Íslandi eða
   10. Skipta um bíl á 5 ára fresti í stað 3ja ára.

Þið sem eruð Facebookvinir Skúla Mogensen.
Endilega sendið honum þetta.