Þegar starfsmaður Veitna ohf. kom að húsi í Garðabæ snemma síðasta sumar til að lesa af mælum fyrir heitt og kalt vatn var enginn heima. Hann skildi því eftir miða og bað húsráðanda að senda inn upplýsingar um mælastöðuna. Húseigandinn gleymdi þessu og í lok sumars var reikningur hans tvöfaldaður. Þetta var Veitum ohf. óheimilt að gera samkvæmt úrskurði Orkustofnunar.

Morgunblaðið skýrir frá þessu í dag. Þar segir að Veitur ohf. hafi tvöfaldað orkureikninginn til að knýja á um álestur. Húsráðandinn, Rúnar Stanley Sighvatsson, gleymdi hins vegar að lesa á mælana, þótt beiðni þar um væri ítrekuð. Í lok sumars fékk hann skilaboð um að reikningur hans hefði verið hækkaður úr 17.861 krónur í 37.730 krónur og var sú upphæð gjaldfærð á greiðslukort hans.

Rúnar var ósáttur við þetta og kvartaði til Orkustofnunar sem segir að ekki megi hækka áætlun sem hluta af þvingunarúrræði til að knýja fram álestur. Því hafi tvöföldun áætlunar og reikningsupphæðar verið ólögleg í þessu tilfelli.