Öldruð kona á 71. aldursári að nafni Krystyna Regina Maszewskahefur verið ákærð fyrir tilraun til manndráps en hún er sökuð um að hafa stungið tengdason sinn. Atvikið átti sér stað laugardaginn 10. nóvember að Suðurgötu á Akranesi. Héraðssaksóknari ákærði Krystynu fyrir helgi.
Í ákæru er Krystyna sökuð um að hafa stungið manninn með tæplega 20 sentímetra löngu blaði, hægra megin við brjóstkassa með þeim afleiðingum að tengdasonurinn hlaut um fjögurra sentímetra breitt stungusár við fjórða og fimmta rifjabil fram hjá brjóstkassa og inn í breiðasta bakvöðvann og olli áverkinn meðal annars skaða á tveimur litlum slagæðum með verulegri blæðingu. Tengdasonurinn fer fram á þrjár milljónir í skaðabætur.
Í gæsluvarðhaldsúrskurðum yfir konunni er málavöxtum lýst nánar. Þar kemur fram að sambýliskona mannsins hafi verið stödd erlendis og átti Krystyna að passa barnabarn sitt. Maðurinn segir að tengdamóðir sín hafi verið mjög ölvuð þegar atvikið átti sér stað og hafi drukkið viskí ótæpilega. Hann hafi hringt á lögreglu sem kom á vettvang. „[Krystyna] hafi virst í lagi þótt hann hafi viðurkennt að hafa drukkið bjór. Barnið sagst ekki vera hrætt af því að brotaþoli væri kominn heim. Hafi lögregla þá farið af vettvangi,“ segir í úrskurði.
Samkvæmt tengdasyninum reiddist Krystyna mikið yfir þessu. „Hafi [Krystyna] að lokum sofnað í sófanum í stofunni. Sjálfur segist [Krystyna] hafa farið að sofa um kl. 22:00 og þá hafi barnið verið sofnað. Hann hafi svo vaknað við það að [Krystyna] hafi verið komin inn í herbergið og búin að kveikja ljós. Hún hafi öskrað að lögregluheimsóknin fyrr um kvöldið væri honum að kenna. Segist brotaþoli hafa gengið að henni og ætlað að færa hana út úr herberginu en þá fundið stungu og honum hafi byrjað að blæða. Kærða hafi þá gengið í burtu,“ segir í gæsluvarðhaldsúrskurði sem féll fyrir jól.
Krystyna neitaði sök í skýrslutök hjá lögreglu en frásögn hennar stangast á við sönnunargögn í málinu. „[Krystyna] hafi tvisvar gefið skýrslu hjá lögreglu og hafi hún sagt frá á svipaðan máta í bæði skiptin. Hún neiti sök, en frásögn hennar sé þó óljós og mjög ófullkomin, auk þess sem framburður hennar stangast verulega á við annað sem fram hafi komið við rannsókn málsins,“ segir í úrskurðinum.
