Mjög ólíklegt er talið að Arion banki, Íslandsbanki og Landsbankinn komi að fjármögnun WOW air. Forsvarsmenn flugfélagsins hafa leitað liðsinnis bankanna til að tryggja að lágmark yfirstandandi skuldabréfaútboðs náist en það nemur sem svarar um 5,5 milljörðum íslenskra króna.

Fréttablaðið skýrir frá þessu í dag. Blaðið segir að stjórnendur og ráðgjafar WOW air vinni nú hörðum höndum að því að fá erlenda fjárfesta til að taka þátt í skuldabréfaútboðinu. Fossar markaðir, sem hafa verið leiðandi í að hafa milligöngu um kaup erlendra sjóða á skráðum hlutabréfum og skuldabréfum á Íslandi á undanförnum árum, eru sagðir koma meira að þessari vinnu núna.

Vonir WOW air eru sagðar vera að á morgun, föstudag, takist að ljúka skuldabréfaútboðinu og að jafnvel takist að afla meira fés en þeirra 5,5 milljarða sem rætt hefur verið um.