Fjórir sitja í gæsluvarðhaldi grunaðir um að hafa stolið allt að 900 kartonum af sígaretttum, eða 180 þúsund sígarettum, úr fríhöfninni í Leifsstöð.

Samkvæmt tilkynningu frá Lögreglunni á Suðurnesjum er talið að þjófnaðurinn hafi verið þaulskipulagður. Eru mennirnir grunaðir um að hafa bókað miða til útlanda en ekki farið í flugið, þess í stað hafi þeir farið í fríhöfnina og stolið sígarettukartonum sem þeir komu fyrir í ferðatöskum.

Einn mannanna var með pöntunarlista frá væntanlegum kaupendum í fórum sér.

Rannsóknin, gerð gerð var í samvinnu við tollgæsluna og ISAVIA, er á lokastigi. Húsleit var gerð á höfuðborgarsvæðinu þar sem lagt var hald á þýfi og ferðatöskur fullar af sígarettukartonum. Tveir mannanna hafa komið við sögu lögreglu áður, þrír hafa viðurkennt aðild sína að málinu. Segir lögregla að við skýrslutökur hafi komið í ljós að einhverjir mannanna hafi stundað stórfellt smygl á sígarettum til landsins.