Ingólfur H. Ingólfsson fjármálaráðgjafi og stjórnarformaður Sparibankans stefnir að því að opna Sparibankann á næstunni þrátt fyrir gjaldþrot móðurfélagsins. Félagið Fjármál heimilanna var úrskurðað gjaldþrota þann 7. mars síðastliðinn.

Ingólfur var áberandi á árunum eftir hrun þar sem hann hélt námskeið um fjármál. Til stóð að opna Sparibankann árið 2011 á Lækjargötu þar sem Hard Rock Café er nú til húsa en erfiðlega gekk að ljúka fjármögnun. Sparibankinn átti að vera rekinn af þýskri fyrirmynd og hvetja til sparnaðar.

Ingólfur segir í samtali við DV að gjaldþrot félagsins sé tímabundið ástand:

„Þetta er bara tímabundið ástand. Það er meira en að segja það að stofna nýjan banka á Íslandi. Það hefur gengið á ýmsu, við höfum unnið að þessu frá 2010. Svona kemur upp á,“

segir Ingólfur.

Þú ætlar s.s. að opna Sparibankann?

„Já já já. Þetta er óheppilegt, en þetta verður keyrt til baka og allt verður gert upp.“