„Ég er þakklátur því grandvara fólki, sem nú kemur fórnarlömbum ofbeldis- og drykkjuumræðu til varnar. Þar eru framarlega í fylkingu þeir sömu fjölmiðlamenn, leikarar og stjórnmálamenn, sem opinberlega niðurlægðu mig, ötuðu mig auri, lugu um mig, kröfðu mig um læknisvottorð, lögsóttu mig og lögðu í einelti mánuðum og árum saman.“

Svona hefst pistill eftir Ólaf F. Magnússon, lækni og fyrrverandi borgarstjóra, í Morgunblaðinu í dag þar sem hann gagnrýnir þá fjölmiðlamenn, stjórnmálamenn og leikara sem telja sig nú hafa fundið fólk sem er verra en þeir sjálfir og má skilja orð Ólafs á þann veg að hann telji þetta fólk vera að kasta steinum úr glerhýsi. Hann víkur síðan lítillega að eigin máli.

„Þessi hryllingur stóð yfir allt frá „stóra vottorðsmálinu“, 29. nóvember 2007, þar til lögsókn á hendur mér lauk, 31. ágúst 2013. Að rifja upp allan sorann og ljótyrðin, sem komu fram í skrifum, á blaðamannafundum, í bókunum í borgarráði, Spaugstofuþáttum, áramótaskaupi og Kastljósþáttum, tæki of langan tíma og rými til að unnt sé að gera það í þessari grein. 13. október 2008 birti breska stórblaðið Daily Mail umsögn um mig, byggða á umfjöllun RÚV („Icelandic National TV“), þar sem ég var sagður spilltur stjórnmálamaður, drykkjusjúklingur og furðufugl og væri í taugaáfalli. Já, þeir eru grandvarir fjölmiðlamennirnir, stjórnmálamennirnir og leikararnir, sem nú æpa sig hása og telja sig hafa fundið fólk sem er verra en þeir sjálfir!“