Grunur leikur á að um eða yfir fimmtíu karlmenn hafi greitt fyrir kynlíf með fatlaðri konu sem leitaði til miðstöðvar fólks sem orðið hefur fyrir ofbeldi. Greint var frá þessu í kvöldfréttum Stöðvar 2. Konan leitaði til Bjarkarhlíðar sem er miðstöð fyrir þolendur ofbeldis. Hefur Bjarkarhlíð sett málið í farveg sakamáls og verður það sent til lögreglu á næstu dögum. Ragna Björg Guðbrandsdóttir er verkefnastjóri hjá Bjarkarhlíð og segir hún að málið sé gríðarlega umfangsmikið. Milli 50 og 60 karlmenn hafi keypt vændi af konunni yfir nokkurra mánaða tímabil. Hafi þeir flestir komist í kynni við hana í gegnum samfélagsmiðla.
Ragna segir málið mjög alvarlegt. Hún segir jafnfarmt að fatlað fólk og fólk með þroskaskerðingu sé oft mjög útsett fyrir ofbeldi. Er þetta alls ekki í fyrsta sinn sem fötluð manneskja leitar til Bjarkarhlíðar vegna ofbeldis sem hún hefur orðið fyrir. Sumar kvennanna sem leiti til Bjarkarhlíðar hafi farið út í vændi sem afleiðingu af ofbeldi sem þær hafa orðið fyrir. Ragna sagði jafnframt að Bjarkarhlíð hlúi að umræddri konu og gæti öryggis hennar.