Kvikuþrýstingur fer vaxandi í Heklu, Grímsvötnum, Bárðarbungu og Öræfajökli og getur þessi hegðun þeirra endað með gosi í þessum eldfjöllum að mati Páls Einarssonar jarðeðlisfræðings. Hann segir að samkvæmt mælingu fari kvikuþrýstingurinn í þeim vaxandi.

Þetta kemur fram í Morgunblaðinu í dag. Haft er eftir Páli að útilokað sé að segja til um hvert þessara eldfjalla gýs næst.

Haft er eftir honum að það sem er að gerast í fyrrgreindum eldfjöllum sé langtímaforboði. Fjöllin séu að undirbúa gos og ef þessi þróun haldi áfram muni þau gjósa í fyrirsjáanlegri framtíð en þau geta einnig hætt við að gjósa að sögn Páls.

Haft er eftir Páli að hann telji að Grímsvötn séu komin á seinni hluta undirbúningsskeiðsins fyrir næsta gos og að Hekla sé komin fram yfir.