Um sexleytið í gærkvöld var tilkynnt um þjófnað úr verslun í Kópavogi. Starfskona horfði á mann setja skópar í poka er hann hafði meðferðis. Óskaði hún eftir því að fá að sjá í pokann þegar maðurinn var að fara út úr versluninni en hann sagði nei og hljóp út úr versluninni. Konan fór á eftir honum og hafði aftur afskipti af honum í nokkurri fjarlægð frá versluninni. Þá dró maðurinn upp hníf, ógnaði konunni og hljóp á brott.

Þetta kemur fram í dagbók lögreglunnar en engum sögum fer þar af því hvort búið er að finna manninn og handtaka. Tvö önnur búðarþjófnaramál voru tilkynnt til lögreglu:

Um hálftíuleytið í gærkvöld var tilkynnt um þjófnað í verslun í hverfi 105. Gerendurnr fóru burt af staðnum í bíl. Lögreglan hafði afskipti af fjórum mönnum í viðkomandi bíl og voru þeir handteknir fyrir rannsókn málsins. Eru þeir auk búðarþjófnaðar grunaðir um akstur undir áhrifum fíkniefna og fyrir vörslu fíkniefna.

Klukkan tvö í nótt tilkynnti starfsmaður í sólarhringsverslun um þjófnað og var grunaður þjófur farinn af vettvangi. Tveimur klukkustundum síðar er þjófurinn kominn aftur á vettvang og var hann þá handtekinn. Var maðurinn í annarlegu ástandi og var vistaður fyrir rannsókn málsins í fangageymslu lögreglu.