Þetta kom fram í Íslandi á dag á Stöð 2 í gærkvöldi en þar ræddi Sindri Sindrason við Brynhildi og foreldra hennar þau Hrafn Ottósson og Margréti Grjetarsdóttur.
Þar kom fram að Brynhildur, sem er yngst þriggja systkina, greindist með krabbamein 2011, aðeins tveggja ára. sjúkdómurinn gerði fyrst vart við sig á sjóntaugunum en það er oft fyrsta birtingarmynd hans að sögn Hrafns. Æxlin dreifa sér ekki en það myndast stöðugt ný. Með lyfjagjöf er reynt að halda sjúkdómnum í skefjum en hann er ólæknandi og óvíst um batahorfur.
Fljótlega eftir að Brynhildur Lára greindist með sjúkdóminn flutti fjölskylda hennar til Svíþjóðar en það 2015 en þá var Brynhildur Lára að byrja í skóla en þá var hún orðin alblind.
Aðeins þremur vikum eftir að fjölskyldan flutti til Svíþjóðar var Brynhildur Lára komin á skurðarborðið á Karolinska sjúkrahúsinu þar sem heilaskurðaðgerð var gerð á henni. Læknum tókst að ná smá hluta af æxli úr heila hennar og út frá honum gátu þeir ákveðið lyfjagjöf Brynhildar Láru að sögn föður hennar.
Hún byrjaði síðan í skóla skömmu eftir aðgerðina. Foreldrar hennar hrósa móttökunum í skólanum þar sem gríðarlega vel var tekið á móti henni, nýkominni úr aðgerðinni og ekki talandi á sænsku. Hún fær nú sérkennslu þar sem einn kennari annast kennslu hennar en námsefnið er það sama og önnur börn á hennar aldri fá enda er Brynhildur vel gefin.
Lyfin sem hún tekur eru enn á tilraunastigi í Bandaríkjunum en 24 daga skammtur af þeim kostar sem nemur einni milljón íslenskra króna en sænska ríkið greiðir kostnaðinn og hefur lyfið reynst vel að sögn Hrafns en ýmsar aukaverkanir fylgja lyfjunum.
Hún á sömu áhugamál og önnur börn á þessum aldri og finnst gaman að vera með öðrum börnum en fötlun hennar setur þó stundum strik í reikninginn að sögn móður hennar. Brynhildur Lára elskar að perla og selur armbönd, lyklakippur og hálsmen á sölusíðu sinni á Facebook, Perlu-búð-Láru.
Styrktartónleikar, sem Vinir-Láru, standa fyrir verða í Seljakirkju í kvöld klukkan 20.
