Lögreglan á Norðurlandi eystra staðfestir í samtali við DV að mál Björns Braga sé komið í formlega skoðun hjá embættinu. Björn Bragi játaði í nótt að hann hafi káfað á 17 ára stúlku um helgina á Akureyri.

„Við heyrðum af þessu fyrst í hádeginu í dag og við höfum ekki sest yfir þetta enn þá en ég reikna fastlega með því að við munum fara yfir málið og ræða við þá aðila sem tengjast málinu. Nú þegar þetta er komið í okkar vitneskju þá þurfum við bara að setjast yfir þetta og hafa samband við hlutaðeigandi, þannig eru þessi mál unnin,“ segir Bergur Jónsson, aðstoðaryfirlögregluþjónn hjá rannsóknardeild Lögreglunnar á Norðurlandi eystra.

Hegningarlög eru skýr hvað þetta varðar, en í 199. grein almennra hegningarlaga segir: „Hver sem gerist sekur um kynferðislega áreitni skal sæta fangelsi allt að 2 árum. Kynferðisleg áreitni felst m.a. í því að strjúka, þukla eða káfa á kynfærum eða brjóstum annars manns innan klæða sem utan, enn fremur í táknrænni hegðun eða orðbragði sem er mjög meiðandi, ítrekað eða til þess fallið að valda ótta.“

Ofan á þetta bætist að lögregla skal hefja rannsókn hafi hún vitneskju eða grun um að slíkt brot hafi verið framið á barni yngra en 18 ára. Það er óháð því hvort viðkomandi barn hafi kært málið til lögreglu. Líkt og Bergur staðfestir í samtali við DV þá hefur lögreglan hafið skoðun á málinu.

DV hefur gert ítrekaðar tilraunir til að ná tali af Birni Braga án árangurs.