Á heimasíðunni City of Love auglýsa vændiskonur þjónustu sína, verð og birta myndir af sér í kynæsandi stellingum. DV fjallaði ítarlega um vændismarkaðinn fyrir skemmstu og komst að því að algengt verð á þjónustunni væri um 25 þúsund krónur fyrir hálftímann og 35 þúsund fyrir klukkutímann.
Vændiskonurnar eru flestar frá Austur Evrópu og hafa þær stutta viðdvöl hér á landi í hvert skipti. Gista þá gjarnan í leiguíbúðum miðsvæðis í Reykjavík, til dæmis Airbnb íbúðum.
Margar vændiskvennanna taka myndir af sér með nýlegum dagblöðum og birta á síðunni. Gera þær þetta til þess að sanna að þær hafi verið á landinu á þeim tíma sem myndin var tekin. Þessi aðferð er ekki ný af nálinni og hefur til dæmis verið notuð af mannræningjum til þess að sýna fram á að gísl sé í þeirra haldi.
Vændiskonurnar nota ýmis dagblöð brúksins en notkun DV hefur aukist að undanförnu. Tvær þeirra notuðu helgarblaðið sem kom út föstudaginn 12. október til að staðfesta veru sína á landinu.
Hvort vændiskonurnar tvær hafi flett blaðinu og lesið góð viðtöl við Hörð Torfason og Sölva Fannar eða kynnt sér nýjustu tíðindi af braggamálinu skal ósagt látið.
Vændi er ekki aðeins stundað í þessum íbúðum af konum sem auglýsa á síðum eins og City of Love. DV fylgdist grannt með kampavínsklúbbum þar sem sterkur orðrómur var um að hægt kaupa vændi. Blaðamenn fóru á staðinn og gátu staðfest að það væri auðsótt mál.
