Ísfirðingurinn og tæknifræðingurinn Steinþór Bragason hefur aldrei neytt tóbaks eða áfengis og stórgrætt á því að eigin sögn. Þegar Steinþór var sautján ára gamall blöskraði honum þær upphæðir sem vinir hans eyddu í þessar vörur. Þá tók hann þá ákvörðun að leggja inn á sérstakan sparireikning andvirði þess sem vinir hans eyddu í þetta í hverjum mánuði. Þessu safnaði hann saman í sérstakan „leikjasjóð“ og var upphæðin orðin vegleg tæpum þremur áratugum síðar.

„Síðan ég byrjaði hef ég safnað um 23 milljónum,“ segir Steinþór, „ég hef reyndar alveg sótt í sjóðinn síðan þá en að minnsta kosti átti ég þá alltaf peninginn til þess að gera eitthvað sem mig langaði til. Það er aldrei sjálfsagt og verður að segjast alveg ótrúlegt að maður hafi náð að standast þetta.“ Steinþór segist hafa notað hluta af þessum sjóði í meðal annars í húsnæði, fjórhjól, tvo bíla, einnig „glænýjan sportbíl úr kassanum“ auk þess að hafa fjárfest í rekstri.

Bætir hann við að vinum hans á yngri árum hafi alltaf þótt þetta hin besta ákvörðun. Steinþór segist ekki hafa fundið fyrir miklum mun á félagslífinu en vinir hans voru afar ánægðir með að hann gat setið undir stýri næturlangt. Hann segist ekki sjá eftir þeirri ákvörðun að gerast bindindismaður fyrir lífstíð. „Ég þekki sjálfan mig svo vel og veit að ég hefði verið efni í góðan drykkjuhrút. Ég er bara þannig týpa og ég tek allt með trompi,“ mælir hann kátur.