Viðvörunin gildir frá klukkan 15 í dag en reiknað er með að veðrið gangi fyrst inn á Breiðafjörð. Þar er spáð stífri suðaustanátt, 13-18 m/s og allt að 30 m/s í hviðum, sem getur rifið með sér létt farartæki og tengivagna. Veðrið færist síðan inn á Faxaflóa. Viðvörun er síðan í gildi fyrir miðhálendið og Suðurland frá klukkan 20.
Á Suðurlandi er spáð suðaustan hvassviðri, 10-15 m/s, en vindur getur orðið meiri á Þórsmerkursvæðinu og meðfram strandlengjunni. Hann getur þá hrifið með sér létt farartæki og trampólín og garðhúsgögn.
Á miðhálendinu er spáð 15-23 m/s með allt að 35 m/s í hviðum í vindstrengjum við fjöll, fyrst vestantil. Þessu fylgir talsverð rigning sunnantil en úrkomulítið verður norðan jökla.
Það er því full ástæða til að fara að öllu með gát.
Í hugleiðingum vakthafandi veðurfræðings segir:
” Núna í morgunsárið liggur lægð við Hvarf og sendir hún okkur veik skil upp úr hádegi með vaxandi suðlægri átt og vætu um V-vert landið í dag. Í kvöld koma önnur skil frá henni og eru þau öllu hraustlegri, en spáð er stífri sunnan- og suðaustanátt með þeim og rigningu, þar af talsverðri rigningu S- og SA-til í nótt og í fyrramálið (föstudag). Hviður við fjöll geta farið upp í 30 m/s og jafnvel 40 m/s á hálendinu. Gular viðvaranir eru í gildi og er fólki bent á þær. Það er ekki útlit fyrir að þessi lægð slái nein met en hún getur engu að síður haft áhrif ef aðgát er ekki höfð, t.d. hjá tjaldferðalöngum, bílum með aftanívagna og fólki með trampólín og laus garðhúsgögn í nærumhverfi sínu.
Í nótt frysti víða á landinu, enda hægur vindur og víða léttskýjað. Næstu nótt er ekki útlit fyrir að hiti fari undir frostmark, en með lækkandi sólu má eðlilega gera ráð fyrir að þetta gerist aftur og aftur á næstu vikum enda ekki mikið eftir af sumrinu.
Á morgun og á laugardag stefnir í suðvestan strekking og skúri eða rigningu S- og V-lands, en annars hægari vind og bjartara veður.“
