„Nýjar skattareglur í Portúgal og tvísköttunarsamningur við Ísland gerir ellilífeyrisþegum kleift að flytja lögheimili sitt til Portúgal og fara í 0% tekjuskatt,“ svona hljómar tilboð sem fyrirtækið Valhalla býður íslenskum ellilífeyrisþegum. Athafnamaðurinn og forsetaframbjóðandinn fyrrverandi Ástþór Magnússon fer fyrir fyrirtækinu hér á landi og er samkvæmt heimasíðu fyrirtækisins framkvæmdastjóri markaðssviðs.
„Við erum nýbyrjaðir að kynna þetta og þetta fer bara vel af stað. Auðvitað er mörgum sem þykir þetta hljóma of gott til að vera satt en ég bendi fólki bara á að kynna sér málið,“ segir Ástþór Magnússon í samtali við DV.
Á heimasíðu Valhalla, núna.is, býðst Íslendingum tvenns konar tilboð sem sagt er að henti flestum Íslendingum. Annað tilboðið er fyrir fólk sem þiggur ellilífeyri og snýr að skattafslætti. „Ellilífeyrisþegar geta flutt skattalegt heimilisfesti til Portúgal og fá þá tekjurnar sínar frá Íslandi greiddar skattfrítt. 0% skattur þökk sé tvísköttunarsamningi Íslands og Portúgal. Skattasparnaðurinn greiðir niður íbúðina,“ segir á vefnum nuna.is
Fyrirtækið býður öðrum Íslendingum einnig upp á að kaupa íbúðir sem að sögn Ástþórs eru seldar langt undir markaðsvirði. „Kaupin greiðast niður með leigu til eftirlaunþega í 7–9 mánuði á ári. Þú nýtur íbúðarinnar í frístundum,“ segir á heimasíðu fyrirtækisins.
Ástþór segir Portúgala hafa breytt skattalögjöfinni til að laða að efnaða ellilífeyrisþega. „Þessi leið var farin til þess að hleypa lífi í efnahagslífið í Portúgal eftir erfiða tíma. Þeir ná tekjum af þessu fólki með neyslusköttum. Ellilífeyrisþegar hvaðanæva að frá Evrópu eru farnir að nýta sér þetta,“ segir Ástþór en til að þess að fá skattafsláttinn þarf eins og áður segir að flytja skattalegt heimilisfesti til Portúgal og dvelja í landinu 183 daga á ári, hið minnsta.
Hann segir ljóst að þó svo að íslenska ríkið verði af skatttekjum þeirra sem færa sig til Portúgal geti ríkið grætt. „Þegar fólk er búið að færa sig yfir tekur portúgalska ríkið við öllu og greiðir alla heilbrigðisþjónustu. Lyf og allt frítt,“ segir Ástþór sem og bætir því við að í Portúgal sé að finna eitt besta heilbrigðiskerfi í veröldinni.
Aðeins einn hópur ellilífeyrisþega getur ekki nýtt sér skattfrelsið en aðrar reglur gilda um lífeyrissjóð starfsmanna ríkisins. „Í tvísköttunarsamningnum eru þeir sem hafa unnið fyrir ríkið undanskildir því þeim ber skylda til að borga skatt af lífeyristekjum í heimalandi sínu,“ segir Ástþór.
Hann segir verkefnið á frumstigi og hvetur alla þá sem hafa áhuga á málinu að skoða heimasíðu fyrirtækisins eða hafa samband.
