Albert Eiríksson listakokkur er ekki lengur velkominn í einn stærsta Facebook-hóp Íslands, Matartips. Ástæðan fyrir þessu liggur nokkuð á huldu þar sem stjórnendur hópsins hafa ekki skýrt brotrekstur hans úr hópnum. Fjölmargir hafa þó lýst yfir stuðningi við Albert og segja sumir að stjórnendur hópsins séu á „powertrippi“, valdóðir með öðrum orðum.
Í færslu sem birtist í hópnum í gær spyr Hallveg nokkur hvort það sé búið að blokka Albert. Það er staðfest fljótt og þá segja meðlimir það ótækt. „Það ætti nú að hleypa Alberti að, hann er snilli í matargerð og bakstri,“ skrifar ein kona.
Önnur skrifar: „Er þetta einhver lélegur brandari? Á þetta í alvöru að vera boð og bönn grúbba? Lágmark að gefa opinbera útskýringu á hvað hann gerði svona agalega af sér, svo við hin getum passað okkur, ef ekki hér inn á þá minnsta kosti til hans svo hann viti um hvað málið snýst.“ Einn karlmaður kemst að kjarna málsins og skrifar: „Við krefjumst útskýringa! #FREEALBERTEIRÍKSSON“
Albert skrifar sjálfur stöðufærslu um málið. Hann kemur af fjöllum og veit ekki hvers vegna honum hefur verið úthýst úr hópnum. „Getur einhver bent stjórnendum Matartips hópsins að það þurfi ekki að loka á mig. Held ég sé ekkert sérstaklega hættulegur,“ skrifar Albert.
Ein vinkona hans spyr hvort hann hafi verið með einhvern dólg. „Nei bara alls ekki. Ég bara skil hvorki upp né niður,“ svarar Albert. Önnur vinkona spyr: „Þú hefur gefið of góða uppskrift kannski?” Því svarar Albert: „Nú er ég svo aldeilis lessa eins og konan sagði.“