Ferðamenn sem fljúga heimshorna á milli gera náttúrunni miklu meiri skaða en vísindamenn töldu. Þetta er samkvæmt niðurstöðum rannsóknar sem birtust í tímaritinu Nature á dögunum.
Í rannsókninni voru fleiri þættir en flugferðir teknir inn í reikninginn. Samkvæmt niðurstöðunum ber túrismi ábyrgð á um átta prósentum útblásturs gróðurhúsalofttegunda á borð við koldíoxíðs í heiminum. Þetta er um þrisvar sinnum meira en áður var talið.
Vísindamennirnir skoðuðu venjur ferðamanna í um 160 löndum um allan heim. Auk þess að taka ferðalög, til dæmis með flugvélum, strætisvögnum, rútum, bílaleigubílum og lestum, með í reikninginn voru matar- og verslunarvenjur skoðaðar.
Þetta er vissulega misjafnt milli ríkja og segir Dr. Aunima Malik, vísindamaður við University of Sydney, að túrismi beri ábyrgð á um 80 prósentum útblásturs á vinsælum ferðamannastöðum, til dæmis Maldvíeyjum og Seychelleyjum.
„Þessi litlu eyríki eru í sérstökum vanda því þau reiða sig að stóru leyti á ferðamennsku,“ segir Malik sem bendir á að sama tíma og túrismi sé að aukast á heimsvísu hafi aldrei verið mikilvægara en nú að gera hann sjálfbæran.