Kynlífsbloggarinn Kara Kristel Ágústsdóttir tilkynnir á Instagram síðu sinni að hún sé hætt að blogga um kynlíf. Hún lýsir blogginu sem brandara sem hafi gengið of langt. Hún skaust upp á stjörnuhimininn samfélagsmiðla síðasta haust þegar hún hóf að blogga um reynslu sína af kynlíf. Stuttu síðar varð hún fastur liður hjá útvarpsþættinum Brennslunni á FM957 þar sem hún var fastur liður með kynlífshorn alla fimmtudaga.

„Í svolítinn tíma hef ég hugsað mikið um þetta. Ég opnaði blogg um kynlíf í haust, það var í djóki. Ég á það til að ganga aðeins of langt í allskonar djóki, og hef alltaf gert. Ég er ekki sérfræðingur um kynlíf, alls ekki. Og ég er enginn kynlífsfíkill. En mér finnst gaman að segja sögur, og þegar ég geri það, geri ég það vel,“ segir Kara Kristel.

Hún segist þó þakklát fyrir margt sem bloggið hefur gefið henni. „Bloggið hefur gefið mér svo mörg tækifæri, kynnt mig fyrir svo mikið af yndislegu fólki og ég er ótrúlega þakklát. En það hefur líka tekið margt frá mér. Það ætti ekki að koma á óvart að ég sé að hætta, ég er varla búin að skrifa neitt í margar vikur/mánuði. Og það er vegna þess að ég fann að mig langaði það ekki,“ segir Kara Kristel.

Hún segir að enginn hafi haft áhrif á þessa ákvörðun hennar. „Mig langar að þakka öllum sem tóku sér tíma til að fylgjast með mér, lesa frá mér og um mig. Mig langar líka til að þakka FM957 fyrir samstarfið, og Áttunni. Það þarf að vera á hreinu að enginn er að hafa áhrif á þessa ákvörðun nema ég, þetta er algjörlega from the bottom of my heart,“ segir Kara Kristel.

Hún segist að lokum hvergi nærri vera hætt á samfélagsmiðlum. „Þið getið áfram fylgst með mér samt, því ég er ekki að hætta á samfélagsmiðlum og er að snúa mér að öðrum spennandi og skemmtilegum hlutum. Að lokum vil ég minna alla á hunting season 2018 er byrjað, og ef einhverjum langar að blogga um kynlíf verð ég stærsti supporterinn,“ segir Kara Kristel.