Óhætt er að segja að tólf ára ástralskur piltur hafi stolið senunni á dögunum eftir að hafa lent í rifrildum við móður sína. Pilturinn ákvað að stela kreditkorti móður sinnar sem hann notaði til að kaupa flug til ferðamannaparadísarinnar Balí á Indónesíu.
Fjallað var um málið í áströlskum fjölmiðlum um helgina. Í umfjöllun 9 News kemur fram að pilturinn hafi dvalið á Balí í fjóra daga áður en yfirvöld höfðu hendur í hári hans.
Pilturinn er sagður hafa skipulagt flóttann, ef svo má segja, nokkuð vel. Hann er sagður hafa kannað og komist að því á netinu að hann gæti flogið einn til útlanda með Jetstar Airways án þess að hafa undirritað bréf frá foreldrum sínum.
Þetta er það sem drengurinn gerði en auk þess plataði hann ömmu sína til að láta hann fá vegabréfið sem hún geymdi. Pilturinn steig því næst upp í lest sem fór með hann út á flugvöll. Hann flaug svo til Balí.
„Þeir spurðu mig bara um skólaskírteini og vegabréf til að sanna að ég væri orðinn tólf ára,“ segir pilturinn, Drew að nafni, við ástralska fjölmiðla. Hann dvaldi á fjögurra stjörnu hóteli í góðu yfirlæti en á endanum var það myndband, sem pilturinn birti af sér á sundlaugarbakkanum, sem kom upp um hann.
Hann er nú kominn aftur til Ástralíu en spurningin er hvort hann reyni síðar að endurtaka leikinn. Móðir hans segir að sá stutti hafi tvisvar áður reynt að leika sama leik, að komast úr landi en þá reyndi hann það með flugfélögunum Qantas og Garuda Airlines. Hvorugt hleypti honum um borð. Forsvarsmenn Jetstar segjast ætla að endurskoða öryggismál hjá sér eftir atvikið.
