Bandaríkin eru líklega mesta hernaðarveldi heimsins og geta auðveldlega látið sprengjum rigna yfir Sýrland í hefndarskyni fyrir meintar efnavopnaárásir sýrlenskra stjórnvalda. En þrátt fyrir að geta ráðist af krafti á Sýrlandi þá munu Bandaríkin standa eftir án áhrifa á atburðarásina í Sýrlandi og framtíð landsins. Bandaríkin og Vesturlönd hafa lítil sem engin áhrif á gang mála í þessu stríðshrjáða landi og munu ekki hafa mikil áhrif á framtíð landsins.

Árás á Sýrland, ef Donald Trump lætur verða af henni, mun ekki gera mikið annað en að vera siðferðileg refsing fyrir hrottalegan stríðsrekstur Assads og hans manna gegn landsmönnum. Árásin mun ekki breyta miklu.

Fyrir ári síðan skaut Bandaríkjaher 59 flugskeytum á Shayratherstöðina í Sýrlandi til að refsa Assad fyrir efnavopnanotkun. Það tók aðeins nokkra daga að koma herstöðinni aftur í fullan rekstur en með góðri aðstoð Rússa gekk uppbyggingin hratt fyrir sig. Rússar hafa komið sér fyrir í Sýrlandi og hafa seilst til áhrifa þar enda er lega landsins mikilvæg út frá mörgum sjónarhornum.

En þegar reykurinn eftir yfirvofandi árás Bandaríkjanna og bandamanna verður horfinn og búið verður að lagfæra skemmdirnar verður staðan í Sýrlandi óbreytt. Rússland, Íran og Tyrkland verða í fararbroddi þar í landi og stýra atburðarrásinni fyrir hönd Bashar al-Assad forseta. Assad er á góðri leið með að sigra í borgarastyrjöldinni sem hefur geisað frá 2011. Vesturlönd, með Bandaríkin í fararbroddi, standa álengdar og geta aðeins fylgst með atburðarrásinni, þau hafa engin áhrif á hana.