Brian Acton, meðstofnandi WhatsApp, græddi milljarða á milljarða ofan þegar Facebook keypti hugarsmíð hans árið 2014. Kaupverðið var 19 milljarðar Bandaríkjadala, tæpir tvö þúsund milljarðar á núverandi gengi.
En nú hefur Acton snúist gegn Facebook og hvetur hann fólk til að loka reikningi sínum á þessum stærsta og vinsælasta samfélagsmiðli heims.
Acton var stuttorður á Twitter-síðu sinni í gærkvöldi þegar hann sagði: „It is time. #deletefacebook.“
Eftir kaup Facebook á WhatsApp hélt Acton störfum sínum fyrir fyrirtækið áfram, en nokkrir mánuðir eru síðan hann lét af öllum störfum. Meðstofnandi hans, Jan Kum, er enn hjá Facebook og á sæti í stjórn fyrirtækisins.
Acton hefur lengi verið ötull talsmaður persónuverndar og netöryggis og hefur hann nú stofnað sjóð sem hefur það að markmiði að tyrgja betur öryggi notenda smáforrita.
Acton sagði ekki hvers vegna hann hvatti fólk til að loka Facebook-reikningi sínum, en leiða má líkur að því að það tengist Cambridge Analytica-skandalnum vestan hafs. Cambridge Analytica er breskt ráðgjafafyrirtæki sem talið er hafa misnotað gögn milljóna notenda Facebook í þágu forsetaframboðs Donalds Trumps. Hefur hlutabréfaverð í Facebook lækkað verulega undanfarna daga vegna málsins.
