Þrír þingmenn hafa bílaleigubíl til umráða frá Alþingi. Alþingi útvegar bílana og greiðir af þeim allan rekstrarkostnað þar á meðal bensín eða díselolíu. Þetta kemur fram í svari skrifstofu Alþingis við fyrirspurn DV. Þingmenn utan höfuðborgarsvæðisins geta fengið jeppa frá Alþingi.
Akstur þingmanna er nú í brennidepli eftir að í ljós kom að Ásmundur Friðriksson þingmaður Sjálfstæðisflokkinn hafi fengið 4,6 milljónir króna í aksturspeninga í fyrra. Þýðir það að Ásmundur hafi fengið 385 þúsund krónur í aksturspeninga á mánuði og keyrt að meðaltali 140 km á dag.
Alþingi er tregt að gefa upp hvaða þingmenn fá hæstu greiðslurnar og vildi skrifstofa þingsins ekki gefa upp hvaða þrír þingmenn það eru sem hafa bílaleigubíl til umráða. Viðmælendur DV innan veggja Alþingis segja að skrifstofan hafi brugðið á það ráð að biðja þingmenn sem keyra meira en 15 þúsund kílómetra á ári að skipta yfir í bílaleigubíl í stað þess að keyra á eigin bifreið og þiggja aksturspeninga.
Alþingi er með samning við Höldur-Bílaleigu Akureyrar og munu þingmenn geta valið hvernig bíl þeir fái. Meginreglan sé að bíllinn eigi að henta þingmanninum og því fái þingmenn sem búi á landsbyggðinni séu á fjórhjóladrifnum fólksbíl eða jeppa.
Elsa Lára Arnardóttir fyrrverandi þingmaður Framsóknarflokksins var með bílaleigubíl þegar hún sat á þingi. Elsa Lára, sem býr á Akranesi, segir í samtali við DV að um hafi verið ræða langtímasamning við bílaleigu.
„Dagbók fylgdi með og bensínkort í ferðir tengdar vinnu. Það varð að fylgjast að til þess að halda utan um greiðslurnar frá Alþingi.“
