Tuttugu og sex ára kona, Christine Tupu, hefur verið dæmd í fimm og hálfs árs fangelsi fyrir stórfelldan fjárdrátt. Tupu þessi var ákærð fyrir að stela 341 þúsund Ástralíudölum, tæpum 27 milljónum króna, frá fyrrverandi vinnuveitendum sínum.

Vinnuveitendurnir sem um ræðir voru Electrolux og Toll, en fjárdrátturinn fór þannig fram að hún bað viðskiptavini um að borga skuldir inn á reikning hennar og eiginmanns hennar, í stað þess að greiða þær inn á reikninga fyrirtækjanna.

Óhætt er að segja að Tupu hafi notið lífsins til hins ítrasta meðan á fjársvikunum stóð. Tupu, sem er frá Queensland, bauð til dæmis vinum og vandamönnum í glæsilegt brúðkaup sem hún hélt á Samoa-eyjum. Greiddi hún flug og gistingu fyrir rúmlega þrjátíu gesti. Þá eyddi hún peningunum í skemmtiferðasiglingar, rándýr hótel og dýr húsgögn.

Verjandi Tupu sagði að upphafið að þessu ævintýri hefði mátt rekja til spilafíknar hennar. Dómari í málinu kenndi þó engu nema græðgi um og dæmdi hana sem fyrr segir í rúmlega fimm ára fangelsi. Eiginmaður hennar var ekki talinn hafa vitað af fjársvikunum og var hann ekki ákærður vegna málsins.