Sagði honum að fara varlega í lífinu
Á þriðjudag greindi DV frá máli Klöru Ólafar Sigurðardóttur, 54 ára gamallar einstæðrar móður, sem neyddist til að borga handrukkurum 150 þúsund króna skuld sonar síns. Sonur hennar er sautján ára gamall, með þroskahömlun og hefur þvælst um í barnaverndarkerfinu lengi.
Hann hefur verið í neyslu í eitt ár og skuldaði tvítugum fíkniefnasala peninginn. Þegar sá maður lést fyrir skemmstu fékk sonurinn símtal frá æðri mönnum í glæpahringnum með hótun um ofbeldi ef hann greiddi ekki skuldina innan viku. Klara greindi DV frá því að drengurinn hafi ekki gert sér grein fyrir alvarleika málsins og biðlaði til fólks að fara varlega í þessum málum.
DV talaði við Klöru aftur daginn eftir til að spyrjast fyrir um hvernig uppgjörið hefði farið fram. Upphaflega ætluðu tveir vinir hennar að fylgja henni en málið æxlaðist þannig að hún mætti handrukkurunum ein. „Ég talaði við þann sem ég átti að hitta og bauð honum að koma inn til mín og ræða málin. En hann vildi það ekki. Hann hefur sennilega verið hræddur um að það væri eitthvert lið hjá mér sem myndi mæta honum.“
Fór svo að Klara gekk að bílaplani við næstu blokk frá hennar þar sem hún var búin að mæla sér mót við handrukkarana. „Einn stóð á planinu en annar beið eftir honum í bíl. Ég rétti honum peningana í klemmu og hann taldi þá.“ Klara segir að sá sem hún talaði við hafi sennilega verið á bilinu 25 til 26 ára og Íslendingur. „Hann var mjög lúpulegur og aumingjalegur. Ég hefði ábyggilega getað lamið hann sjálf. Þetta var einhver milliliður, sá sem átti skuldina passaði að láta ekki sjá sig.“
Þegar afhendingu peninganna var lokið gerði Klara nokkuð óvænt. „Ég tók utan um hann og sagði: Farðu varlega í lífinu. Hann titraði bara og skalf. Jafnframt sagði ég við hann að ef ég heyrði múkk frá þeim aftur og ef drengnum yrði hótað þá færi ég lengra með þetta. Þið skuluð ekki snerta drenginn eða mína fjölskyldu aftur.“