Ríkisstjórn Nýja-Sjálands ákvað í gær að fram fari rannsókn á meintu kynferðisofbeldi gegn fósturbörnum á árunum 1950 til 1999. Á þessum tíma voru um 100.000 börn í umsjá ríkisins. Það er Roayal Commission into Historical Abuse in State Care sem stýrir rannsókninni. Jacinda Ardern, forsætisráðherra, hét því í kosningabaráttunni síðasta haust að rannsókn sem þessi færi fram en hún hefur sagt misnotkunina hafa verið „samviskulausa“.

Ardern segir að það verði að horfast í augu við mistök fortíðarinnar til að koma í veg fyrir að þau eigi sér aftur stað. Árum saman hafa fyrrum fósturbörn skýrt frá kynferðisofbeldi og andlegu og líkamlegu ofbeldi sem þau urðu fyrir þegar þau voru í fóstri. Ardern segir að það hafi verið hlutverk ríkisins að vera í einhverskonar foreldrahlutverki fyrir viðkvæmustu börn samfélagsins. Nú sé tækifæri til að horfast í augu við söguna og tryggja að sömu mistök verði ekki gerð aftur.

„Þetta er mikilvægt skref í þá átt að viðurkenna og læra af reynslu þeirra sem voru beittir ofbeldi í umsjá ríkisins.“

Sagði hún.

Rannsóknin hefst síðar á árinu. Tracey Martin, innanríkisráðherra, segir að meðal þess sem verður rannsakað verði áhrifin á frumbyggja Nýja-Sjálands, Maóría, en í gegnum tíðina hafa mörg börn Maóría verið tekin af foreldrum sínum og sett í fóstur.

Samfélag Maóría er verst setta samfélagið eða þjóðfélagshópurinn á Nýja-Sjálandi en atvinnuleysi þessa hóps er meira en hjá öðrum þjóðfélagshópum, fátækt er meiri og afbrotatíðni er hærri.