„Ég held að það sé erfitt að keppa við Ísland þegar kemur að staðsetningu. Ég get ekki séð fyrir mér að einhver fari að koma fyrir eyju í miðju Atlandshafi,“ segir Skúli Mogensen forstjóri WOW air í samtali við vef Reuters.

Í grein Reuters er talað um vinsældir Íslands sem áfangastaðar ferðalanga sem eru á leið yfir Atlantshafið og að það megi einkum þakka WOW air lággjaldaflugfélaginu. Á seinasta ári jókst farþegaumferð um Keflavíkuflugvöll um 28 prósent.

Í samtali við Reuters líkir Skúli aukningunni við það sem hefur verið að eiga sér stað á alþjóðaflugvellinum í Dubai. „Dubai var ekki til fyrir 100 árum. Í dag fara rúmlega hundrað milljónir farþegar í gegnum flugvöllinn á hverju ári.“

Þá kom fram að samkeppnisaðilar WOW air á borð við Delta og Air France hafi þurft að endurskoða verðstrúktúr sinn og framboð eftir að WOW air hóf að bjóða upp flugferðir á lágu verði milli Íslands og Norður Ameríku.

Aðspurður um hvort flugfélagið myndi bjóða upp á ferðir til Asíu í framtíðinni vildi Skúli ekki segja annað en að það væru mikil „vaxtartækifæri.“ Neitaði hann að nefna mögulega áfangastaði.

Þá sagði hann það vera í áætlunum WOW air að fara „lengra og dýpra“ í fluginu til Bandaríkjanna og bjóða upp á flug til áfangastaða þar sem ekki hefur áður verið boðið upp á beint flug til Evrópu. Áður hefur verið tilkynnt að WOW air muni bjóða upp á áætlunarferðir til Cleveland, Detroit, St. Lous, Dallas og Cinncinati.

Norska flugfélagið Norwegian air er aðalkeppinautur WOW Air þegar kemur að ódýru flugi á milli Skandinavíu og Bandaríkjanna en flugfélagið á í dag rúmlega helmingshlut í markaðnum. Á meðan á WOW air rúmlega fjórðung í markaðnum.