Davíð Oddsson ritstjóri Morgunblaðsins fagnar sjötugsafmæli sínu í dag, af því tilefni mætti hann í útvarpsviðtal á K100. Sunginn var afmælissöngur fyrir Davíð og honum færð kaka.
Forverar hans á ritstjórastóli Morgunblaðsins, Matthías Johannessen og Styrmir Gunnarsson, hættu báðir þegar þeir urðu 70 ára, aðspurður hvort hann hygðist hætta sagði Davíð: „Nei ég er ekki að hugsa um það. Orðum þetta svona, ég er sjötugur og Mogginn 105 ára. Ekki hætti hann þegar hann var sjötugur,“ sagði Davíð við mikla kátínu þáttastjórnenda.
Davíð fór yfir víðan völl og ræddi meðal annars um barnabörnin, sagði hann að eitt þeirra hafi haft á orði nýverið að hann „bullaði bara“, sagðist Davíð feginn að hafa ekki þurft að heyra slíka hreinskilni þegar hann var í stjórnmálum. „Ég er jafn geggjaður og Donald Trump. Ekki það að ég sé að segja að hann sé geggjaður,“ sagði Davíð og hló.
Rifjaði hann upp tíð sína sem borgarstjóri Reykjavíkur á árinum 1982 til 1991 og upplýsti að hann hefði haft fjarstýringu að gosbrunninum á Tjörninni, var hann viss um að eiga enn fjarstýringuna. Davíð hefur verið ritstjóri ásamt Haraldi Johannessyni í átta ár, segist hann aðeins hafa tekið sér viku í sumarfrí á þeim tíma. Haldið verður upp á afmæli Davíðs í Morgunblaðshúsinu í Hádegismóum í dag, hefst veislan kl.16.
