Margir gátu hlegið yfir misskilningi Bryndísar Steinunar, förðunarfræðings og biblíukennara, en hún varð fyrir því óláni að kaupa svokallaðan vegaborgara sem hún hélt að væri vegan. Vegaborgari er þó ekki vegan vegna majónes sem finna má á borgaranum.

Vísir greindi fyrst frá þessum misskilningi. Bryndís tilkynnti fyrr í dag innan íslenska vegan-hópsins á Facebook að Olís hygðist bregðast við þessum misskilningi. „Ég var að fá símtal frá Olís áðan. VEGA BORGARINN verður breytt í vegan og ég fæ að vera fyrsti viðskiptavinurinn sem bragða á honum. Segið svo að misskilningur geti ekki haft gott í för með sér,“ skrifar Bryndís.

Margir slógu á létta strengi vegna misskilningsins. Jón Már nokkur skrifaði athugasemd við frétt Vísis sem fékk vel fimmta hundruð læka: „Já ég lenti einmitt í þessu. Ætlaði að kaupa humar en endaði með hamar. Það verður að hafa auðveldari nöfn á humari.“ Penninn Eymundsson notaði tilefnið til að auglýsa bæði veganbók og vegabók.

Í samtali við DV má heyra á Bryndísi að hún taki gríninu ekkert nærri sér. „Ég dey úr hlátri, þetta er það fyndnasta sem ég hef lent í,“ segir Bryndís.

Að gefnu tilefni. #næstumþvítvífararhttps://t.co/noaev8dKkO pic.twitter.com/ph0QDeSsVI

— Penninn Eymundsson (@pen_eym) January 15, 2018