Atli Már Gylfason blaðamaður hvetur íbúa Reykjanesbæjar til að gefa hvalskoðunarfélagi lélega einkunn á Facebook og Tripadvisor. Reykjaneshöfn situr uppi með milljóna króna kostnað vegna förgunar á flaki félagsins.
Atli Már Gylfason blaðamaður hvetur alla íbúa Reykjanesbæjar til að gefa hvalaskoðunarfélaginu Gentle Giants lélega einkunn á Facebook og TripAdvisor. Víkurfréttir greindu frá því í gær að félagið hafi losað sig við skuldsett skipsflak á eina krónu og þar með hafi Reykjaneshöfn setið upp með milljóna króna kostnað vegna förgunar á flakinu. Atli Már deilir þessum skilaboðum innan Facebook-hópsins Reykjanesbær – gerum góðan bæ betri. Ljóst er að átakið hefur nú þegar haft nokkur áhrif en á einungis ríflega klukkutíma hefur einkunn félagsins á Facebook farið úr um 4.5 stjörnum í 2.8 stjörnur.
Atli Már segir í samtali við DV að það sé algjörlega óþolandi að ferðaþjónustufyrirtæki skilji eftir ruslhaug í höfninni. Kostnaður vegna þess lendi bæði beint og óbeint á íbúum Reykjanesbæjar. „Reykjaneshöfn á í miklum fjárhagserfiðleikum vegna stóriðjunnar í Helguvík og ekki er þetta til að bæta þá stöðu. Stundum verða íbúar að standa upp þegar hefðbundnar leiðir duga ekki til þess að fá svona sóða til að þrífa upp eftir sig. Með því að gefa þeim lélega einkunn á Facebook-síðu þeirra og TripAdvisor geta íbúar komið á framfæri skýrum skilaboðum, bæði til Gentle Giants og þeirra ferðamanna sem hyggjast versla við þá,“ segir Atli Már.
Víkurfréttir greindu frá því í gær að félagið hafi afsalað bátnum, Stormi SH 333, til nýs eiganda á Þingeyri. Báturinn hefur verið í höfninni í næstum áratug. Reykjaneshöfn þurfti að kaupa bátinn, á eina krónu, til þess að geta komið bátnum á land og fargað honum. Víkurfréttir hafa eftir Halldóri Karli Hermannssyni, hafnarstjóra Reykjaneshafnar, að kostnaður hafnarinnar vegna málsins skipti milljónum króna.
Stefán Guðmundsson, framkvæmdastjóri Gentle Giants, hefur svarað Atla Má í stöðufærslu hans um málið. Hann gagnrýnir fréttaflutning Víkurfrétta og vonast til að Atli taki til baka áskorun sína. „Mér finnst afskaplega dapurt hvernig þetta mál hefur farið. Umræddur bátur var mér mjög kær. Ég byrjaði minn skipstjórnarferil á honum 21 árs gamall, hugsaði um hann eins og barnið mitt og hann reyndist afar farsæll. Það segir vonandi sitt að hafa átt hann öll þessi ár og staðið við allar skuldbindingar með uppbyggingu í huga; þar til við breyttum okkar áherslum í rekstri fyrirtækisins,“ skrifar Stefán meðal annars.