Borðspil fjalla ekki öll um stríð, morðgátur eða kaup á fasteignum og hótelum. Sum hafa mjög sérstök þemu eins og til dæmis Red November sem fjallar um drukkna sovéska dverga í kafbát og Habemus Papam sem fjallar um páfakjörið árið 1655.
Nú er á leiðinni borðspilið Reykholt frá Frosted Games í Þýskalandi, sterkasta vígi spilamenningarinnar. Leynd hvílir yfir gangverki spilsins, sem verður þó svokallað „worker-placement“ spil, þar sem leikmenn helga sér staði í hverri umferð, en eins og nafnið gerist það á Íslandi. Flestir myndu tengja nafnið við Reykholt í Borgarfirði, Snorra Sturluson og Sturlungastyrjöldina. Slíkt spil hefur áður verið gefið út hérlendis og nefndist Sturlungaspilið frá 1989.
Hið nýja spil fjallar hins vegar um Reykholt í Biskupstungum og grænmetisræktina þar. Samkvæmt útgefanda er takmarkið að rækta tómata og gúrkur í gróðurhúsum og fá ferðamenn á staðinn til að spreða peningum.
Höfundur spilsins er enginn aukvisi í bransanum heldur frekar goðsögn, sjálfur Uwe Rosenberg. 47 ára Þjóðverji sem hefur gefið út borðspil í tuttugu ár og hannað þau síðan hann var barn. Hann hefur gefið út heimsþekkt spil á borð við Bohnanza, Agricola, Le Havre og Patchwork og unnið verðlaun á Spiel Des Jahres, sem er nokkurs konar óskarsverðlaun borðspilanna.
Reykholt mun verða sýnt í október á ráðstefnunni SPIEL í Essen, stærstu sinnar tegundar í heiminum.
