Svo virðist vera sem einhver góðhjartaður einstaklingur hafi skilið eftir óvæntan glaðning fyrir Hjálpræðisherinn í Suður Karólínu í Bandaríkjunum á dögunum.
Verið var að safna klinki í bauk fyrir utan verslun Walmart í Tega Cay. Þegar starfsfólkið fór yfir það sem kom í baukinn í dagslok kom í ljós lítill sjaldgæfur gullpeningur sem metinn er vel á annað hundrað þúsund krónur. Um er að ræða suðurafríska mynt, Krugerrand, sem var slegin fyrir rúmum 40 árum.
Talsmaður Hjálpræðishersins segir að myntin muni koma að góðum notum og á von á því að henni verði komið í verð. Venjulega safnast um 300 dalir, rúmar 30 þúsund krónur, í söfnunum sem þessum, að sögn talsmanns Hjálpræðishersins, en til samanburðar má búast við því að um 1.200 dalir, tæpar 130 þúsund krónur, fáist fyrir myntina.