Ríflega tvítugur maður, Kristleifur Kristleifsson, hefur verið dæmdur í tveggja ára fangelsi fyrir fjölmörg brot í Vestmannaeyjum. Svo virðist sem hann hafi gengið berserksgang aðfaranótt föstudagsins 5. ágúst, um viku eftir Þjóðhátíð, en öll brotin utan eitt áttu sér stað þá nótt.

Af afbrotum Kristleifs eru tvær sérstaklega hættulegar líkamasárásir alvarlegastar. Hann var dæmdur fyrir að hafa ráðist á karlmann sem lá í rúmi á heimili sínu, en Kristleifur sló hann með krepptum hnefa í andlitið, henti sjónvarpi tvisvar sinnum í höfuð hans og sparkaði nokkrum sinnum í líkama hans, en spörkin lentu meðal annars á höfði hans. Af heimili þessa manns stal Kristleifur 14 töflum af þunglyndislyfinu Ecitalopram.

Hann var enn fremur dæmdur fyrir hafa ráðist á annan mann í sama húsi og slegið hann nokkrum sinnum með krepptum hnefa í andlitið og slegið hann margsinnis með hamri í líkamann.

Kristleifur var enn fremur dæmdur fyrir að hafa brotist inn í bifreið þessa sömu nótt og rifið frá spjald undir mælaborði og stýri þannig að vírar héngu niður úr mælaborðinu. Kristleifur var svo dæmdur fyrir að hafa stolið 75 lundum sem voru í reykingu í reykskúr.

Kristleifur viðurkenndi brot sín skýlaust en hann á að baki langan sakaferil þrátt fyrir ungan aldur. Hann var til að mynda dæmdur í 8 mánaða fangelsi þann 7. september 2016 fyrir líkamsárásir.