Að sögn Loga Más Einarssonar, formanns Samfylkingarinnar, mun það líklega koma í ljós undir lok sunnudags hvort flokkarnir fjórir sem nú ræða stjórnarmyndun ná saman. Þetta kom fram í stuttu spjalli DV við Loga í morgun. Hann segist vera hóflega bjartsýnn á að þetta takist.

Stjórnmálarýnendur margir telja að Píratar gætu orðið helsta hindrunin í vegi þess að flokkunum fjórum, VG, Samfylkingu, Framsókn og Pírötum, takist nú að mynda stjórn, að þeir þurfi að gefa mest eftir af grundvallarstefnumálum sínum. Samfylking þurfi hins vegar að leggja ESB-kröfur sínar til hliðar, sem sé töluverð fórn, en hins vegar sé ekki mikill ágreiningur milli VG og Framsóknar.

DV spurði Loga hvort hætta væri á að viðræðurnar strönduðu á Pírötum og hvort langt væri á milli flokka í einhverjum málum. Logi sagði: „Ég svara engu um afstöðu annarra. Þótt flokkarnir séu sammála um margt eru þeir líka á margan hátt ólíkir.“