Ferðin á milli Parísar og flugvallarins í Beauvais, norðan við frönsku höfuðborgina, tekur um 75 mínútur með flugrútunni. Undanfarið hefur mikið borið á þjófnaði úr ferðatöskum sem voru í farangursgeymslu í rútunni og hefur fólk staðið ráðþrota frammi fyrir þessu og ekki fundið neina skýringu á hver eða hverjir hafi verið að verki og hvernig staðið var að þjófnuðunum. En rúmri viku tók árvökull bílstjóri eftir svolitlu einkennilegu við eina ferðatöskuna, sem var í farangursrými rútu hans, og þannig komst upp um hvað hafði verið í gangi.

Að vonum vakti það mikla undrun að munir hurfu úr töskunum þegar þær voru í farangursgeymslum á leiðinni á milli borgarinnar og flugvallarins enda geymslurnar undir rútunni og ekkert aðgengi að þeim innan úr farþegarýminu. Fyrir rúmri viku tók árvökull bílstjóri eftir því að þegar verið var að setja stóra svarta ferðatösku inn í rútuna þá var eins og taskan hreyfðist. Hann var ekki lengi að átta sig á hvað var á seyði og hringdi strax í lögregluna.

Lögreglumenn biðu síðan eftir rútunni á endastöð hennar á flugvellinum og opnuðu farangursrýmið og umrædda ferðatösku. Í henni var rúmenskur karlmaður sem var handtekinn grunaður um að hafa stolið úr ferðatöskum í rútunni. Hann hafði haft nægan tíma til að athafna sig í farangursrýminu á leiðinni til flugvallarins og taka verðmæti úr töskum farþeganna.

Í töskunni, sem Rúmeninn var í, fann lögreglan tölvu, peninga og önnur verðmæti sem tilheyrðu honum ekki. Annar Rúmeni var síðan handtekinn vegna málsina að sögn AFP.

Sá sem var í töskunni var dæmdur í átta mánaða fangelsi í síðustu viku en samverkamaður hans var dæmdur í eins árs fangelsi en hann fékk þyngri dóm vegna fyrri dóma sem hann hefur hlotið í Frakklandi.