Lögreglan í Massachusetts telur sig hafa upplýst óhugnanlegt morðmál frá árinu 1992 þegar hin tuttugu og fimm ára gamla Lisa Ziegert fannst látin.

Lisa þessi var á kvöldvakt í gjafavöruverslun í bænum Agawam en hún var í tveimur vinnum til að láta enda ná saman. Á daginn starfaði hún sem kennari þar sem hún aðstoðaði nemendur með sérþarfir. Lisa var vel liðin og vinsæl meðal nemenda sinna.

Það var svo að kvöldi 15. apríl 1992 að Lisa hvarf sporlaust. Snemma að morgni þess 16. apríl tóku vegfarendur eftir því að verslunin var enn opin en Lisa var hvergi sjáanleg. Fjórum dögum síðar, á páskadag, fannst lík hennar en í ljós kom að henni hafði verið nauðgað og hún stungin til bana.

Þrátt fyrir umfangsmikla rannsókn lögreglu á sínum tíma fannst morðinginn ekki. Nokkrir lágu undir grun og voru yfirheyrðir en lögregla taldi sig ekki hafa nóg í höndunum til að fara með þann grun lengra.

Að því er AP-fréttastofan greinir frá virðist morðinginn þó loksins hafa verið handtekinn á dögunum. Anthony Gulluni, saksóknari í Hampden, segir við AP að 48 ára karlmaður, Gary Schara að nafni, hafi verið handtekinn. Náinn ættingi Gary er sagður hafa látið lögreglu fá skrifaða yfirlýsingu frá honum þar sem hann játaði að hafa nauðgað og myrt Lisu á sínum tíma. Lögregla gerði síðan DNA-rannsókn sem leiddi í ljós að Gary var maðurinn sem nauðgaði Lisu á sínum tíma.
Gary á yfir höfði sér lífstíðarfangelsi.