Said Aalla, átján ára piltur, bað móður sína um fyrirgefningu áður en hann var skotinn til bana í bænum Cambrils, skammt frá Barcelona, á fimmtudagskvöld. Aalla er talinn hafa tilheyrt neti öfgafullra einstaklinga sem lögðu á ráðin um hryðjuverkaárásir í Barcelona og nágrenni.

Fyrr þennan sama dag ók Younes Abouyaaqoub á fjölda fólks á Römblunni, helstu göngugötu Barcelona, með þeim afleiðingum að þrettán létust og tugir slösuðust, margir alvarlega.

Spænska blaðið El Mundo greinir frá því að Aalla hafi skrifað bréf til móður sinnar sem hann skildi eftir á náttborði sínu áður en árásin var framin. Aalla var sem fyrr segir í hópi manna sem skotnir voru til bana eftir að bifreið var ekið á gangandi vegfarendur í Cambrils, nokkrum klukkutímum eftir ódæðisverkin á Römblunni.

Að sögn El Mundo þakkaði Aalla foreldrum sínum fyrir allt sem þeir höfðu gefið honum og bað auk þess um fyrirgefningu vegna þess sársauka sem hann myndi valda með gjörðum sínum.

Innanríkisráðherra Spánar, Joaquim Form, hefur staðfest að Younes sé maðurinn sem ók bifreiðinni niður Römbluna. Hann flúði á hlaupum og er talinn hafa gengið upp að háskólasvæði borgarinnar, en gangan tók um einn og hálfan tíma. Þar er hann talinn hafa stungið 34 ára karlmann, Pau Perez, til bana áður en hann tók bifreið hans af gerðinni Ford Focus. Greint var frá því fyrr í dag að Younes hafi verið skotinn til bana.

Spænska blaðið La Vanguardia segir að Pau hafi nýlega flutt inn í nýja íbúð með kærustu sinni. Skömmu áður en hann var stunginn til bana hafði hann hringt í aðstandendur sína og látið þá vita að hann væri heill heilsu.