Einn var skotinn til bana og annar særðist í árás í Vårberg í suðurhluta Stokkhólms í gærkvöldi. Tilkynnt var um skotárásina á tólfta tímanum í gærkvöldi. Þegar lögreglumenn komu á vettvang fundu þeir tvo menn, annar var látinn en hinn særður.
Aftonbladet segir að sá látni hafi verið á þrítugsaldri. Þrír hafa verið færðir til yfirheyrslu að sögn Aftonbladet. Blaðið segir að sá látni hafi verið skotinn fjölmörgum skotum í höfuð og bringu. Þrír grímuklæddir menn sáust yfirgefa vettvang á skellinöðrum sem fundust skömmu síðar en þá var búið að kveikja í þeim.
