Erlend kona fannst meðvitundarlaus í Bláa lóninu í morgun en hún var þar gestur ásamt eiginmanni sínum. Samkvæmt upplýsingum frá lögreglunni á Suðurnesjum fór konan í öndunarstopp á leiðinni í sjúkrabíl sem flutti hana til Reykjavíkur. Tilkynnt var um málið klukkan 09:34 í morgun. Var starfsfólki og gestum brugðið.

Magnea Guðmundsdóttir upplýsingafulltrúi Bláa lónsins, segir í samtali við DV að starfsmenn hafi strax brugðist við og komið konunni til aðstoðar. Hlúðu þeir að konunni og þurfti að beita hjartahnoði. Þrautþjálfaðir starfsmenn staðarins fengu einnig aðstoð frá erlendum lækni og hjúkrunarfræðingi sem voru gestir í lóninu á sama tíma. Magnea segir:

„Starfsfólk okkar er vel þjálfað gerði allt rétt við þessar erfiðu aðstæður. Haft var samband við 112 og kom sjúkrabíll á vettvang tíu mínútum síðar. Konan komst til meðvitundar stuttu eftir að hún kom upp úr lóninu en við vitum ekki um líðan hennar á þessari stundu.“

Hjá lögreglunni á Suðurnesjum fengust þær upplýsingar að konan hafi verið flutt með sjúkrabíl á bráðamóttöku Landspítalans og fór eiginmaður hennar með.