Gæti óskað eftir dómskvöddum matsmönnum
Verjandi Thomasar Møller Olsen, sem grunaður eru um að hafa myrt Birnu Brjánsdóttur í janúar, var síðdegis í dag veittur tveggja vikna viðbótarfrestur til að fara yfir gögn í málinu. Þá var Thomas úrskurðaður í áframhaldandi gæsluvarðhaldi til 23. maí næstkomandi.
Næsta fyrirtaka í málinu verður þann 9. maí næstkomandi. Dómari í Héraðsdómi Reykjaness upplýsti jafnframt við fyrirtökuna í dag að verjandi Thomasar kynni að óska eftir dómkvöddum matsmönnum. Ekki hefur verið greint frá því hvað mennirnir eiga að meta.
Í ákærunni gegn Thomasi, sem var þingfest í Héraðsdómi Reykjaness þann 10 apríl síðastliðinn, segir að höfða beri sakamál í Héraðsdómi Reykjaness á hendur Thomasi fyrir fyrir manndráp með því að hafa að morgni laugardagsins 14. janúar svipt Birnu Brjánsdóttur lífi.
Þar segir að ákærði hafi veist að Birnu í bifreið af gerðinni KIA RIO sem lagt var nálægt flotkví við enda hafnarkantsins í Hafnarfjarðahöfn og/eða á öðrum óþekktum stað, slegið hana ítrekað í andlit og höfuð, tekið hana kverkataki og hert kröftuglega að hálsi hennar og í framhaldinu, á óþekktum stað, varpað Birnu í sjó eða vatn, allt með þeim afleiðingum að Birna hlaut punktblæðingar í augnlokum, táru og glæru augnlokanna og innanvert á höfuðleður, þrýstingsáverka á hálsi, þar á meðal brot í skjaldkirtilsbrjóski, nefbrot og marga höggáverka á andlit og höfuð og drukknaði.
Einnig er Thomas ákærður fyrir stórfellt fíkniefnalagabrot fyrir að hafa til umráða rúmlega 20 þúsund grömm af kannabisefnum sem hann hugðist flytja til Grænlands í ágóðaskyni.
Þess er krafist að ákærði verði dæmdur til refsingar og greiðslu alls sakarkostnaðar og að fíkniefnin verði gerð upptæk.
Af hálfu foreldra Birnu er þess krafist að ákærði greiði þeim miskabætur að upphæð 10.550.000 hvor, ásamt vöxtum. Einnig er þess krafist að ákærði greiði útfararkostnað að fjárhæð kr. 761.101 ásamt vöxtum.
