Viðurkenndi að hafa ekið undir áhrifum
Ökumaður sem lagt hafði í bifreiðastæði við lögreglustöðina í Keflavík í gærkvöld reyndist sofa ölvunarsvefni undir stýri þegar lögreglumenn ætluðu að taka hann tali.
Þetta kemur fram í tilkynningu frá lögreglustjóranum á Suðurnesjum. Þá segir að ökumaðurinn hafi viðurkennt að hafa ekið undir áhrifum áfengis.
Hann var færður inn á lögreglustöðina þar sem tekin var af honum skýrsla. Var ökumaðurinn síðan látinn sofa úr sér. Maðurinn gat ekki framvísað ökuskírteini og í bifreið hans fannst tveggja lítra flaska með meintum landa.
