Skil nálgast nú landið úr suðvestri með vaxandi austanátt og snjókomu eða slyddu. Suðlægari vindur og rigning sunnan- og suðvestantil síðdegis og hlýnar. Slydda allra nyrst á morgun, en annars smáskúrir og milt í veðri. Ákveðin norðaustanátt norðantil á landinu annað kvöld og slydda eða snjókoma, en hægari vindur og rigning í öðrum landshlutum. Dregur síðan úr vindi og úrkomu á föstudag.

Suðlæg átt og rigning

Þetta kemur fram í frétt á Veðurstofu Íslands. Þar segir janframt að von sé á snjókomu eða slyddu vestanlands með morgninum en norðan- og austantil eftir hádegi. Heldur hægari suðlæg átt og rigning eða súld sunnan- og suðvestantil síðdegis og hlýnar.

Austan og norðaustan 8-13 nyrst á landinu á morgun og slydda, en annars suðlæg átt 5-10 og smáskúrir. Norðaustan 8-15 norðantil og slydda eða snjókoma annað kvöld, en annars hægari suðaustlæg átt og rigning. Hiti kringum frostmark norðantil, en hiti 2 til 8 stig sunnantil.

Hálkublettir

Hálkublettir og éljagangur eru á Reykjanesbraut og víða á Reykjanesi og Höfuðborgarsvæðinu. Vegir á Suðurlandi eru að mestu greiðfærir þó er eitthvað um hálkublettir s.s. á Hellisheiði og Mosfellsheiði.

Hálkublettir eða snjóþekja er víða á Vesturlandi.Á Vestfjörðum er snjóþekja eða hálka. Hrafnseyrarheiði og Dynjandisheiði eru lokaðar, einnig er ófært í Árnesshrepp.

Á Norðurlandi vestra er hálka eða hálkublettir. Flughálka er á milli Varmahlíðar og Öxnadalsheiði. Á Norðausturlandi er hálka á Öxnadalsheiði. Hálka, hálkublettir eða snjóþekja er á örðum leiðum. Éljagangur er mjög víða. Þungfært er á Hófaskarði.

Það er greiðfært að mestu á Austurlandi en hálkublettir eru á flestum fjallvegum. Greiðfært er með Suðausturströndinni.