„Ég man lítið eftir þessu en ég finn fyrir afleiðingunum. Ég er enn aumur í skrokknum eftir barsmíðarnar,“ segir Jóhann Björn Guðmundsson, fangi á Litla-Hrauni, sem varð fyrir fólskulegri meðferð fangavarðar í byrjun árs. Atvikið var talið það alvarlegt að kæra var send til lögreglu sem rannsakar málið. Málið er rannsakað sem sakamál þar sem fangavörðurinn er gerandi og Jóhann brotaþoli.

Fangaverðinum var umsvifalaust vikið frá störfum auk þess sem þrír aðrir fangaverðir eru grunaðir um að hafa hylmt yfir með gerandanum og kunna að eiga yfir höfði sér refsingu vegna þess.

Líður illa á Litla-Hrauni

Jóhann Björn hefur um langt skeið glímt við alvarlegt áfengisvandamál og var í óminnisástandi þegar fangavörðurinn lagði á hann hendur. Honum líður illa inni á Litla-Hrauni. „Það er erfitt að upplifa þessa frelsissviptingu og mér finnst ekki að ég eigi heima hér. Ég er ekki glæpamaður, ég er alkóhólisti,“ segir Jóhann Björn í samtali við DV.

Hann hefur hlotið nokkra dóma sem alla má rekja til óhóflegrar áfengisneyslu. „Ég hef þurft að greiða sektir vegna óspekta á almannafæri og hlaut núna síðast fangelsisdóm í nokkra mánuði. Það finnst mér ansi hörð refsing. Ég hef reynt að fá að komast frekar í meðferð en það hefur ekki gengið eftir,“ segir Jóhann Björn.

Jóhann Björn er fæddur og uppalinn á Suðurlandi. Hann gerðist bóndi aðeins 23 ára gamall, kvæntist og eignaðist börn. Upp úr sambandinu slitnaði en alls á Jóhann Björn fimm börn með þremur konum. Þá starfaði hann um langt skeið sem tamningamaður og er margverðlaunaður sem slíkur. „Tamningarnar snúast að miklu leyti um að geta haldið ákveðnum takti. Ég spilaði á trommur sem krakki og er því ágætlega taktviss. Það er lykillinn,“ segir Jóhann Björn og nýtur þess greinilega að rifja upp gamla tíma. Hann hélt sér að mestu edrú í mörg ár en slys fyrir rúmum áratug gerði að verkum að hann datt af beinu brautinni. Bakkus hefur haft yfirhöndina síðan.

Kostnaður fyrir samfélagið

Undanfarin ár hefur Jóhann Björn verið eini heimilislausi íbúinn á Selfossi. „Ég er af góðu fólki kominn og á marga fjölskyldumeðlimi á Selfossi. Ég held að ég sé almennt vel liðinn í bænum og ég reyni að koma vel fram við fólk þrátt fyrir erfiðleikana sem ég glími við. Það þekktu mig allir í bænum en það hefur breyst undanfarin ár,“ segir Jóhann Björn. Hann segir að aukinn fjöldi aðkomumanna og útlendinga sem starfi í verslunum bæjarins hafi gert honum erfitt um vik.

„Ég geri engum mein og það vissu allir. Núna má ég varla rölta framhjá verslunum þá er lögreglan kölluð til. Áður fyrr leystu lögreglumennirnir málið með lagni en ungir afleysingamenn í dag taka á málunum af of mikilli hörku. Það er dýrt fyrir samfélagið að einhver fyllerísvitleysa fari í gengum allt dómskerfið og endi með því að ég sé dæmdur í fangelsi,“ segir Jóhann Björn.

Hann bendir á að mörg hundruð einstaklingar séu á biðlista um að hefja afplánun, í flestum tilvikum einstaklingar sem hafi gerst sekir um verri glæpi en hann og séu jafnvel hættulegir samfélaginu. „Ég hef ekki gert neinum mein, nema sjálfum mér.“